مشهد رأسي علي واقع عبثي

الوضع الحالى يسد النفس بشكل عام . اللفة ال 360 درجة اللى لفيناها حوالين نفسنا لخبطت الجميع بلا استثناء.

ما كناش نتخيل فى أسوأ كوابيسنا ان تريقتنا على نفسنا من مسرحية المحاكمات الهزلية واننا اللى هانكون فى السجون بدل السفاحين اللى كانوا ماسكين البلد تتحول لحقيقة .

لكن لأننا اعتدنا التفكير الغلط فكالعادة بدل ما تروح عنينا على اللى لعب بينا كلنا ولبسنا فى الحيط بعلم اطراف وبرعونة اطراف اتجهت الأنظار للشباب اللىى بيحلم ببلد يعرف يعيش فيها.

دعوات تجرع السم من قبل الاخوان على أساس انهم الفصيل الأكبر بالتوقف عن المظاهرات والتنازل عن الشرعية اللى اتسرقت وتغيير الاستراتيجيات ودعوات التصالح المشروط ما وقفتش يوم والمبادرات ما بيعديش يوم من غير ما نسمع جديد.

نجح الكل فى وضع الاخوان فى خندق اللى بيضر بمصالح الوطن وان مطالب الشرعية هى مطالب خاصة بالجماعة مالهاش علاقة لا بثورة ولا بمصلحة البلد ولا بأهداف ثورة يناير عيش حرية عدالة اجتماعية كرامة انسانية.

كلمة باطلة عايزين بيها باطل ومش قادرة أحمل الإخوان مسئولية الفشل الكامل فى الرد على الهرتلة دى قدام آلات اعلامية ونشطاء وقوى ثورية شغالة زن و غسل فى دماغ الناس.

الشرعية وعودة المؤسسات المنتخبة هدفها المعلن والصريح هو وضع قاعدة إن أى سيسي لا ينقلب على أى مرسى منتخب بإرادة الناس حتى لو بأغلبية 51% زى أى دولة محترمة وياخد مدته كاملة ويتشال بعدها بصندوق وتانى وعاشر ومليار زى أى دولة محترمة.

حكاية بقى ما ترفعش شعار رابعة قصاد اننا ننزل معاك اولا ده تخريف لانى مش مطلوب انسى آلاف ماتت فى رابعة والنهضة وقبلهم المنصة والحرس الجمهورى كن الاخوان وغير الاخوان اللى انت بعتنى فيهم بالمناسبة وعملت نفسك نايم قصاد ان انت مش ناسى اللى ماتوا منك فى محمد محمود وبتقول علي الإخوان باعوك فيها واللى انت برضه فى نفس الوقت شلت اللى قتلك فيها على الكتاف فى 30 سونيا.

شغل مجانين وسورى كيد نسوان مش ثورة بالمرة.

محمد محمود كدبة كبيرة روجتها وصدقتها وعندنا تويتاتك وبوستاتك سكرين شوت تثبت عكس اللى عمال تعيد وتزيد فيه بخصوصها وبخصوص كدبة جمعة قندهار وهتاف يا مشير انت الامير وتثبت برضه انك فاجر فى الخصومة وكلمة ثورى دى خسارة فيك.

يا ترى مطلوب منى اتنازل عشان ماهر اللى للأسف كان يعلم ونخلى الجيش يشيل الاخوان ونحكم احنا واللا دومة اللى كان نفسه كل الإخوان يموتوا فى رابعة ومراته اللى دايرة تتحايل على السيسى يفرج عنه واللا انسى علاء عبد الفتاح اللى قال النهضة فيها سلاح وداب الناس فيها محروقين فى ساعتين ؟

مش عارفة بصراحة مطلوب كام عدد غير ال 6000 شهيد وفوق ال 41 الف معتقل أغلبهم اخوان ده غير حالات اغتصاب جوة المعتقلات للبنات وأطفال بالمئات مقبوض عليها بتهم كوميدية عشان ترضوا عنهم ومش عارفة أصلا الإخوان حريصين على مد الإيد ليكم ليه؟

وبفرض اننا هانعمل من بنها قصاد مؤتمر حمضين امبارح 1 ديسمبر 2014 اللى بيقول فيه ان الاخوان مش فصيل ثورى ومرفوض فى الحراك بعد ما كانوا الاخوان دول مترشح هو وحزبه الكرامة اللى ماحدش يعرف عنه حاجة على قوائمهم وكانوا وقتها دحة ودلوقت كخة فده ينسف من أساسه مطلبكم بتنازل الاخوان عن مطالبهم اللى بيخرجوا يطالبوا بيها من سنة ونص بلا كلل او ملل واصرار عجيب وصمود بعدم الاندفاع وحمل السلاح عشان تتكرموا وتتعطفوا وتنزلوا معاهم.

وده يأكد إن هدفكم مش ثورة لكن هدفكم حاجة من اتنين إما الإخوان وأى فصيل له مرجعية اسلامية ضد الإنقلاب يبعد عن السياسة خالص ويخليه فى الجمعيات الأهلية الخيرية ودور الأيتام ورعاية المسنين ويسيبهالكم وده اسمه فاشية وديكتاورية واقصاء وتبقوا أبشع من نظام المخلوع.

أو إن الإخوان تبقى مجرد عدد يزود حشدكم ويمشوا وراكم من سكات على اعتبار انكم اللى فاهمين وثورجية وانتم بس اللى عارفين مصلحة البلد فين وده برضه يأكد إنكم زى الطبلة صوتها عالى وفارغة من جوة بس ليكم اتصالات بناس برة الله أعلم اتصالات شريفة واللا لأ وإنكم على الأرض صفر كبير كبيركم 5000 واحد متركزين فى القاهرة وشوية فى اسكندرية ومحافظة أو محافظتين وخلاص وإنكم عارفين كويس جدا إن الصراع السياسى على الأرض كان ومازال صراع وطنى – إخوان لأننا أصلا ما عندناش أحزاب .

نيجى بقى لتنازل الإخوان عن الشعارات واللافتات والهتافات ورابعة والحوار ده عشان يخلى الناس تضم عليهم . الطلب ده ظاهره رحمة وباطنه عذاب بامتياز لأسباب كلنا شايفينها ولامسينها وهاحاول ألخصها  هنا وممكن حد يضيف أكتر :

•  ناس مش حاسة بقيمة إن يبقى ليها صوت فى صندوق وان ده اللى هايحسن احوالها مع الوقت لما تحط على أى كرسى من أول المحليات مرورا بالنقابات لغاية كرسى الرئاسة اللى يخدمها مش اللى يسرقها نعمل معاها إيه ؟
• ناس مغسول دماغها من الإعلام اللى عمال يقولها أمنك أهم من الديمقراطية.
• ناس بيتقال لها مافيش ماعنديش وفى نفس الوقت شايفة العز اللى عايش فيه اللى ماسك البلد والمنافقين اللى تبعهم وساكتة .
• ناس شايفة إن مافيش ماعنديش صراحة يشكر عليها الخسيس لكن اللى قاللهم عايزين نملك سلاحنا وغذائنا ودوائنا وبدأ فعلا كداب وبيضحك عليهم .
• ناس طول الوقت تشتكى من ان الاحوال زفت والبلد خرابة وبدل ما تفكر مين اللى عمل كده فيهم بقاله سنين تقولك الحمد لله الإخوان مشيوا.
• ناس عارفة اللى بتعمله الداخلية فى أى واحد مقبوض عليه من قبل ما يتحقق معاه ويتقدم لمحاكمة ويدافع عن نفسه ان ده عادى وما بتتهزش فيها شعرة طالما قفاها بعيد عن ايد الداخلية.
• ناس مش بنى آدمين أصلا وعايزين تزعلوا ازعلوا احساسها بالإنسانية معدوم.
• ناس بتقولك اى حد ينزل يتظاهر يتسحل هو واللى يتشددله وأهله كمان كفاية قرف وخلى البلد تمشى واللى مات مات وخدى فلوس واسكتوا .
•  ناس ما حركهاش الدم اللى سال واللى بيسيل وبتكدب جيرانها وأصحابها اللى شافوا بعينهم الموت وبيأكدوا فى كل لحظة إن ماكانوش مسلحين وبتصدق الإعلام.
• ناس حتى لقمة العيش وكوباية المية والعلاج اللى مش لاقيينه ما حركهاش وحطة البيادة فى بقها.
• هل مطلوب منى أغير عشان الناس دى شعاراتى وأهدافى وهما أتباع كل ناعق ولو الإعلام بكرة قاللهم الإخوان أنضف ناس فى مصر ومرسى كأن يشبه الخلفاء فى حكمه هاتصدق وتسقف ؟؟

استقيموا يرحمكم الله وياريت تركزوا فى عصابة السفاحين والقتلة والخونة اللى شافطين البلد وياريت تواجهوهم بربع اللى بتقولوه على الإخوان ليل نهار واخرجوا ضدهم وارفعوا إى شعارات وانزلوا بالأندر وير لو حبيتوا وشيلوه بدل ما انتم ماسكين كرابيج للإخوان وعصاية ايس كريم على اللى واكس البلد وفاضحنا .