فى الشغل

توصل شغلها بعد الهرجلة اللى بتشوفها كل يوم فى شوارع المحروسة .. وعادة تدور على الغلابة اللى زيها تسلم عليهم

عمرها ما تعالت على ملح الشركة ودايما كانت بتتجنب اللى مناصبهم كبيرة .. ما عندهاش استعداد تضحك على نكتة سخيفة تطلع منهم أو تجامل مجاملة غبية تحتقر نفسها بعدها واذا جم فى نفس مكانها تلخم نفسها باى حاجة والرد على قد السؤال ولسان حالها "شغلى هو جواز مرورى هنا ياباشا لكن ماليش فى مسح الجوخ أو توطية الراس"

بعد الانقلاب كل شئ عادى اللى زاد حزن فى عنيها على حلم ضاع رغم معافرتها هى وغيرها لابقائه حيا لكن ما قدرتش تتعامل طبيعى بعد الدم اللى سال وقاطعت اللى كانوا فاهمين لكن الأيدلوجيا كانت اقوى من مصلحة البلد أما الجهلة فاكتفت بشعرة معاوية

نقاش ساخن بين واحدة مؤيدة للإنقلاب مطلقة خلع وواحدة معارضة مطلقة بحكم محكمة قبل قانون الخلع .. الخلع بتقول للمحكمة انتى اللى أذاكى اخوانى هو وعيلته ولسة بتأيديهم أنا مش فاهماكى الصراحة ، ردت المحكمة قالتلها وانا برضه مش فاهماكى هو اللى أذاكى واطلقتى منه خلع كان اخوان وانا ما اعرفش ؟

شافت وسمعت كتير مساخر تصريحات الإسلام الوسطى الجميل واتحرق دمها كتير من ضياع ثوابت دينية ما كانتش تتصورها أو تتصور مدى جهل الناس بالدين وثوابته والتاريخ ..

لكن الموظفة الجديدة خلتها تقول ياريت ما ننحدرش من الإسلام الوسطى الجميل لخيط الإسلام الرفيع .. شابة 36 سنة بتدخن بشراهة مطلقة مرتين الأول بعد قصة حب من ظابط شرطة بتسب طول الوقت فيه وفى الجهة اللى هو تبعها لكن ده ما ممنعاش انها تنزل 30 سونيا ضد الاخوان !!!! ظلم وفساد وسلخانة الداخلية أهون عليها منهم

والطلاق التانى طبقا لروايتها من واحد من بتوع قال الله وقال الرسول البيرة عنده حلال لكن باقى الخمور حرام .. لبست الحجاب عشان ترضيه لكن هى مش مقتنعة أصلا بفرضيته عشان الحجاب مش فرض والحجاب حجاب العقل وهى الحمد لله عارفة حدودها طبعا الحدود دى  تشمل انها بتشرب خمرة وتسهر وترقص وتقول كلام قبيح وبتلبس هدوم – مشيها هدوم -  لو اتمطعت هاتتمزع من على جسمها لكن بتعطف على الفقرا وبتحكى موافقها فى الموضوع ده

ما تسألنيش على الصلاة عشان الصلاة والإسلام الرفيع ده دونت ميكس وربنا عاقل وبيفهم وبيسامح والدين يسر مش عسر وانت مش هاتدخل بين العبد وربه وربنا عارف اللى فى قلبى ومش انت اللى هاتقول مين داخل الجنة ومين داخل النار .. بلا بلا بلا

حجتها هى واللى زيها "آدى ياسيدى بتوع قال الله وقال الرسول شوف بيعملوا إيه ؟" .. عن عمد أو عن جهل بينسوا إن ربنا هو اللى هايحاسب على التفريط اللى بيعملوه مش بتوع قال الله وقال الرسول.

هى ماعلقتش اصلا ....  سمعت وبس قدام المنطق المفحم ده

عواجيز الشركة بقى حدث ولا حرج عن المؤامرة الكونية اللى الخلايجة بيعملوها ضد البلد الجميلة دى وازاى عاهر السعودية هدد امير قطر خلاه جاب ورا عشان مصر الشقيقة الكبرى وكدهون وماتنساش مصر كانت رايحة فى داهية والهاشتاج انقذها والخلايجة دول البترول هايخلص وهايشحتوا (لاحظت كلمة "هايشحتوا" دى ؟؟؟ ال "ها" فى المستقبل لسه .. مع غض الطرف عن كوننا عايشين شحاتة من سنين تعبنا فى عدها) وده غير نظام احنا اللى علمناهم ... صباح الهرى

زميل تانى داير يردد كلام السلفيين اياهم اللى تبعهم واللى بايعلهم دماغه من زمان لكن ده ماممنعوش يفضح اخص خصوصياته مع مراته فى فترة الخطوبة مع زميلة تانية .. انتهزت اول فرصة يتكلم فيها وينتقد تصرف البعد عن ربنا بقال الله وقال الرسول قامت فاضحاه .. 

شكرا على الجهلة اللى بيتكلموا فى الدين .. جاتكو القرف مليتو البلد

فى مقالتى 1919 اتكلمت عن دولة العواجيز ضيف عليها الإدارة بالعشوائية اللى مالية الشركات بالمعلش وعشان خاطرى وعادى واصله غلبان .. وعدم فصل المال عن الإدارة وابن البرنس لازم يثبت انه راجل فى البيت .. يوووه قصدى ابن صاحب الشركة لازم يبقى مدير .. حكاية بيفهم واللا لا قول يا باسط ما تتعبش قلبك كتير

ييجى زميل  من كلامه تعرف ان مخه اعلامى محلى بامتياز .. عن ايام الملك العظيمة وناصر اللى خرب البلد .. وبكرة هايبقى احلى من النهاردة .. طب ازاى يا عمونا هو ده مش حكم عسكر وامتداد لناصر اللى خربها ؟؟ لا ما تقوليش عسكر قولى جيش ......... فى سرها قالت واااو تصدق فيه فرق فعلا ... طب ممكن تبص على الخريطة اللى قدامنا دى وتشاورلى على دولة بيحكمها جيش فى العالم المتقدم وناجحة ؟؟ آه روسيا ... (تفتكروا أفحمها ؟؟؟؟) طب هو احنا زى روسيا ؟؟ رد رد عبقرى تانى عن إنهم مش هايسمحولك تبقى اقوى او تبقى دولة متقدمة وهاتفضل اسرائيل سابقاكى .. طب إحنا حلوين من أياتوها ناحية طاه ... صدقينى البلد دى جميلة

(شايفة قلوب وورود حمرا طايرة فى الهوى وعينُ الرِّضا عن كلَّ عيبٍ كليلة ٌ)

واحدة تانية كانت واقفة جنبها ايام ثورة يناير وعارفة قد ايه البلد خربانة لكن كل المعرفة دى اتبخرت فى الهوى وعايشة على اقناع نفسها بأى حاجة عكس الواقع ومافيش على لسانها غير "يا جماعة لا اكيد مش ده المقصود .. اكيد مش هايحصل"  .. ويطلع ده المقصود ويطلع ده بيحصل وهى على العهد باقية (مع الاعتذار للزمالكاوية)

واحد من ملح الارض بيشتكى من الكبار اللى فى الشركة ولوائاتها أصحاب المعاشات المتعينين لزوم تسهيل الورق اللى شايفين نفسهم اسياد البلد وقتلوا واتقتلوا ومن حقهم يعيشوا مميزين عن باقى الشعب ودول اللى بيتنططوا عليه وشايفينه هو واللى زيه عالم زبالة (سمعها بودنه : عالم زبالة)  لكن اختار السيسى عشان يصلح البلد .... سبحان من أبدعك.

(تعاطفك لوحده مش كفاية ما صاحبتنا اللى عقلها هايطير دى)

كام موظف بس فضلوا الصمت النبيل قصاد كم الهرتلة ده وقالوا باختصار دول ما يستهلوش حرقة الدم معاهم

ترجع البيت بعد يوم حافل تلاقى ضيفة جديدة جاية تزور والدتها تسألها بنت أختها الصغيرة عمرها 5 سنين هو انتى مرسى واللا سيسى ؟ الست ضحكت قالتلها ليه ؟ - عشان السيسى بيقتل الناس وانا مش باحبه.